CAUAYAN CITY – Nasawi ang isang magsasaka matapos na salpukin ng isang truck ang sinasakyang motor sa Brgy. Alibadabad, San Mariano, Isabela ngayong hapon, unang araw ng Abril.
Ang biktima ay kinilalang si Dionisio Barroga Sr., 57-anyos, residente ng Brgy. Bagong Sikat, Naguilian, Isabela.
Sa panayam ng Bombo Radyo Cauayan kay PSMS Rogelio Mallillin Ignacio Jr., tagasiyasat ng San Mariano Police Station, binabaybay ng motor at truck ang magkasalungat na direksyon nang bigla na lamang umanong umagaw ng linya ang truck dahilan upang masalpok ang kolong-kolong ni Barroga.
Dahil palusong ang kalsada ay hindi aniya naka preno ang 6×6 truck na nagresulta sa banggaan.
Nagtamo ng malubhang sugat sa katawan ang biktima na agad dinala sa pagamutan subalit idineklarang dead on arrival ng attending physician.
Kusang loob namang sumuko sa San Mariano Police Station ang driver ng truck matapos ang insidente, at kasalukuyang nasa kustodiya ng pulisya para sa dokumentasyon .
Depensa ng driver ng truck na nawalan umano siya ng preno kaya umagaw na lamang siya ng linya para iwasan ang sinusundang elf truck.
Nag tungo na ang pamilya ng biktima sa himpilan at nakiusap na aasikasuhin muna nila ang burol ng kaaanak bago mag pasya kung sasampahan ng kaso ang driver ng truck.
