Hihilingin ng House prosecution panel sa Senate impeachment court na ideklarang hostile witness si Davao City Mayor Sebastian Duterte sakaling tumestigo ito sa impeachment trial laban kay Vice President Sara Duterte.
Ayon kay House prosecution legal spokesperson at counsel Benjamin Tolosa Jr., ipatatawag si Mayor Duterte kaugnay ng Article II ng Articles of Impeachment, na tumatalakay sa umano’y unexplained wealth at mga kuwestiyon sa idineklarang financial interests ng Pangalawang Pangulo.
Partikular na nais ng prosecution na talakayin ang Gencorp Industries Inc., isang kumpanyang idineklara ni Vice President Duterte na mayroon siyang financial interest sa kanyang Statement of Assets, Liabilities and Net Worth o SALN.
Batay sa ulat, nakakuha umano ang Gencorp ng kontratang nagkakahalaga ng ₱14 milyon mula sa Davao City government.
Sinabi ni Tolosa na hihilingin nilang ideklarang hostile witness si Mayor Duterte kung mapatutunayang taliwas sa interes ng prosecution ang kanyang posisyon bilang testigo.
Kapag idineklarang hostile witness, maaaring gumamit ang prosecution ng leading questions sa pagtatanong, na karaniwang hindi pinahihintulutan sa isang ordinaryong testigo na tinatawag ng parehong panig.
Nauna nang inatasan si Mayor Duterte na humarap sa Senate impeachment court sa Setyembre 23. Gayunman, sinabi ng korte na maaari itong magbago depende sa magiging takbo ng paglilitis sa Setyembre 21 at 22.
