Humiling ang Office of the Vice President (OVP) ng P250 milyong confidential funds noong Agosto 2022 bago nito isinumite sa Department of Budget and Management (DBM) ang kaukulang physical at financial plan, ayon kay OVP Assistant Secretary Lemuel Ortonio.
Sa ika-18 araw ng impeachment trial ni Vice President Sara Duterte, kinumpirma ni Ortonio sa direct examination ni private prosecutor Mae Divinagracia na nilagdaan ni Duterte ang request para sa P250 milyong confidential funds.
Gayunman, sinabi ni Ortonio na walang kalakip na physical at financial plan ang unang liham ng OVP sa DBM noong Agosto 2022.
Ayon sa saksi, isinumite lamang ng OVP ang naturang plano noong Setyembre 19, 2022, o 28 araw matapos ang unang request. Inaprubahan naman ito ng OVP noong Setyembre 16, tatlong araw bago isumite sa DBM.
Kalaunan, inaprubahan ng Office of the President ang P125 milyong confidential funds para sa OVP noong 2022, na inilabas noong Disyembre ng parehong taon.
Samantala, sinabi ng House prosecution panel na kahina-hinala ang pagsusumite ng spending plan matapos humiling ng pondo, na inilarawan ni Lanao del Sur Rep. Zia Adiong bilang “putting the cart before the horse.”
Sa P125 milyong confidential funds ng OVP noong 2022, naglabas naman ang Commission on Audit ng notice of disallowance sa P73 milyon na disbursement.
