Naka-high alert na ang Philippine Red Cross (PRC) matapos ang biglaang pagtaas ng aktibidad ng Bulkang Mayon nitong Sabado.
Ayon sa ulat, bandang 4:28 PM ay nagkaroon ng lava collapse na nagdulot ng rockfalls at ashfall sa mga kalapit na lugar.
Sinundan ito ng Strombolian activity alas 4:50 PM, at pagsapit ng 6:00 PM, nakapagtala ng pyroclastic density currents (PDCs) sa Mi-isi Gully sa timog hanggang timog-kanlurang bahagi ng bulkan.
Kasabay nito, nakapuwesto na ang mga RC143 volunteers sa Camalig, Guinobatan, Legazpi City, at Daraga upang magbigay ng real-time na dokumentasyon at updates sa operations center. Patuloy ang koordinasyon ng PRC sa mga lokal na awtoridad at disaster response agencies para matiyak ang kaligtasan ng mga residente sa Bicol.
Nagbabala ang PRC sa mga komunidad na huwag pumasok sa mga danger zone, lalo na sa mga daluyan ng ilog at gullies na maaaring daanan ng mabilis na daloy ng mainit na gas at debris.
Pinapayuhan din ang mga mamamayan na manatili sa loob ng bahay kung may ashfall, gumamit ng protective masks, at tiyaking nakatakip ang pagkain at tubig upang maiwasan ang kontaminasyon.
Samantala, ang Bulkang Kanlaon ay nagbuga naman ng abo mula sa summit crater bandang 1:25 PM nito ring Sabado.
Ayon sa PHIVOLCS, umabot sa 700 metro ang taas ng plume bago ito lumipad patungong kanluran-timogkanluran.
Nanatili sa Alert Level 2 ang Kanlaon, na nangangahulugang may moderate unrest ngunit wala pang indikasyon ng malawakang pagputok.
Matatandaan na nagbuga ng malaking volume ng abo ang Bulkang Mayon ngayong hapon, araw ng Sabado, Mayo 2, 2026.
Ayon kay Philippine Institute of Volcanology and Seismology Director Dr. Teresito Bacolcol sa panayam ng Bombo Radyo Legazpi nangyari ito bandang alas 4:28 ng hapon kung saan naglabas ito ng malaking volume ng Pyrcolastic Density Currents.
Dahil umano ito sa lava effussion sa summit ng Bulkan kung kaya nagkaroong ng collapse at nag-generate ng PDCs partikular na sa Mi-isi Gully sa South Western Slopes nito.
Tinatayang umaabot ng 4km ang inilabas na PDCs ng Bulkang Mayon ngayong araw, kung kaya makikita ang malaking volume nito.
Dagdag pa ng opisyal na ito na ang pinakamalaking PDCs na na-generate ng Bulkang Mayon mula noong una nitong eruption.
Pinapaalalahanan rin ang lahat ng nasa karatig lugar na delikado kung umabot man sa 6km ang abo sa mga kumunidad lalo na sa mga kababayan na may kumplikasyon sa baga maging sa mga buntis.
Sa ngayon, pinagiingat ang lahat at mahigpit pa rin na ipinagbabawal ang pagpasok sa 6km permanent danger zone habang nananatili sa alert level 3 ang Bulkang Mayon.
