Isang beteranong photojournalist ang nasawi habang nagco‑cover ng Traslacion ng Feast of the Jesus Nazareno ngayong Biyernes, Enero 9.
Ang nasawi ay kinilalang si Itoh Son, isang photojournalist ng Saksi Ngayon, na nakaranas umano ng atake sa puso malapit sa Quirino Grandstand kaninang madaling araw.
Ayon sa paunang ulat mula sa Manila Disaster Risk Reduction and Management Office (MDRRMO), natagpuan si Son na walang malay at walang pulso malapit sa MPD Station 5, at idineklara siyang patay na sa lugar.
Ibinahagi ng kanyang mga kasamahan na ilang araw na siyang nakararamdam ng sintomas ng trangkaso, ngunit nagpatuloy pa rin sa pag‑cover ng mga aktibidad bago ang Traslacion kabilang ang tradisyunal na “Pahalik” dahil sa kanyang dedikasyon sa trabaho.
Patuloy ang pagbabantay at suporta ng mga awtoridad para sa seguridad at kaligtasan sa gitna ng malaking bilang ng deboto sa prusisyon ngayong taon, habang sinusunod ang mga kinakailangang hakbang para maiwasan ang mga insidente sa masisikip na lugar.
