Inakusahan ng kampo ni Vice President Sara Duterte ang administrasyong Marcos ng umano’y paggamit sa mga institusyon ng pamahalaan para sa pampulitikang pag-uusig, kasunod ng mga pahayag ni National Bureau of Investigation (NBI) Director Melvin Matibag tungkol sa umano’y mga pagkakaiba sa mga ari-ariang nakasaad sa Statement of Assets, Liabilities and Net Worth (SALN) ng Bise Presidente.
Ayon sa kampo ni Duterte, inilabas ni Matibag sa media ang umano’y resulta ng imbestigasyon nang hindi muna pormal na ipinapaalam sa Bise Presidente ang mga paratang o binibigyan siya ng pagkakataong sumagot.
Sa halip, ipinasa umano ni Matibag ang ulat ng NBI sa Office of the Ombudsman, na ayon sa kampo ni Duterte ay naglalayong maiwasan ang agarang pagsagot ng Bise Presidente sa mga alegasyon.
Kinuwestiyon din ng kampo kung bakit hindi isinama ng prosecution panel ang naturang mga natuklasan sa impeachment trial, kung saan maaaring masuri, kuwestiyunin at sagutin ng depensa ang mga ebidensya tungkol sa umano’y hindi idineklara o maling idineklarang mga ari-arian sa SALN ni Duterte.
Mariing iginiit ng Bise Presidente na tama at tapat niyang idineklara ang lahat ng kaniyang ari-arian at pananagutan sa SALN, at itinanggi ang mga alegasyon laban sa kaniya.
Ayon sa kaniya, tiwala siyang mapatutunayan ang kaniyang panig sa impeachment trial at, kung kinakailangan, sa Ombudsman kapag nabigyan na siya ng pormal na abiso tungkol sa mga paratang.
