CAUAYAN CITY – Sugatan ang mahigit limang Estudyante matapos matumba ang sinasakyan nilang elf truck na may kargang saku-sakong mais sa Macayucayu, San Mariano, Isabela.
Ang naturang sasakyan na minamaneho ni Jojo Casuela ay patungo sana sa town proper ng San Mariano para ibenta ang mga karga nitong mais.
Lulan din ng truck ang mahigit sampung estudyante na patungo rin sa bayan ng San Mariano.
Nang makarating sa mataas na bahagi ng daan ay nawalan umano ng preno ang sasakyan dahilan upang matumba ang truck at madaganan ng saku-sakong mais ang mga lulan nitong estudyante.
Mahigit lima sa mga ito ang malubhang nasugatan at ang isa ay nawalan ng malay bunsod ng malubhang sugat na natamo nito sa kaniyang ulo habang hindi naman nasaktan ang iba.
Naging agaran naman umano ang pagresponde ng mga rescuer at agad na nadala ang mga biktima sa pagamutan.
Maliban sa pagkakaroon ng problema sa preno ng truck ay isa naman sa tinitingnan dahilan ay ang masyadong marami na karga ng naturang truck.
Nagpapatuloy naman ang isinasagawang pagsisiyasat ng kapulisan hinggil sa naturang insidente.
