Reresolbahin na ng panel of prosecutors ng Department of Justice (DOJ) ang sedition at rebellion complaints na inihain ng Philippine National Police-Criminal Investigation and Detection Group laban kay suspended Cavite 4th District Rep. Francisco “Kiko” Barzaga.
Noong Biyernes, Enero 23, ay nagsumite na ng kanyang counter-affidavits si Barzaga kaugnay sa inciting to sedition o paglabag sa Article 142 at inciting to rebellion/insurrection o paglabag sa Article 138 ng Revised Penal Code (RPC), na inamyendahan kaugnay sa Section 6 RA 10175, o Cybercrime Prevention Act of 2012.
Sinabi ni DOJ Spokesperson Polo Martinez na nahaharap sa reklamo si Barzaga kaugnay sa Facebook post niya noong Oktubre 2025 na nagpakita ng suporta sa mga panawagan na ihiwalay ang Mindanao at kilos protesta sa Forbes Park, sa Makati City.
Noong Disyembre ay sinuspinde ng House dahil sa mga post niya sa social media.
Samantala, may tatlong cyber libel complaints na kinakaharap si Barzaga dahil sa mga paratang na tumanggap umano ng suhol ang mga miyembro ng National Unity Party (NUP) mula sa bilyonaryong si Enrique Razon Jr. para sa speakership ni Leyte Rep. Martin Romualdez.
