Ipinakita ni ML Partylist Rep. Leila De Lima, ang mga ebidensya kaugnay ng ikalawang ground ng impeachment complaint laban kay Vice President Sara Duterte, na tumatalakay sa umano’y maling paggamit ng confidential funds na inilaan para sa Department of Education (DepEd) noong 2023.
Ayon kay De Lima, ginamit ang Office of the Vice President para ipamahagi at gastusin ang mga confidential funds, imbes na direktang gamitin sa mga proyektong pang-edukasyon. Napansin niya ang ilang iregularidad sa dokumentasyon, kabilang ang mga payees na may kulang o hindi kumpletong pangalan, resibong inilabas sa iba’t ibang lugar sa loob ng iisang araw, at pagtanggap ng pera ng ilang indibidwal gamit ang iba’t ibang pirma.
Ipinakita rin ni De Lima ang mga dokumento ng pag-release ng pondo, listahan ng payees, resibo, at ilang bank records na nagpapakita ng hindi pagkakatugma sa inaasahang transaksyon. Ayon sa kanya, ang mga ebidensyang ito ay hindi lamang simpleng lapses sa administrasyon kundi maaaring magpahiwatig ng mas malawak na problema sa pamamahala at pananagutan ng pondo ng gobyerno.
Ang mga dokumentong ito ay isinumite na sa House Committee na naghahawak sa impeachment proceedings upang masusing masuri at maging bahagi ng debate kung dapat ituloy ang proseso laban sa bise presidente.
