Bago ang posibleng pag-upo ng Senado bilang impeachment court laban kay Vice President Sara Duterte, pinaalalahanan ni Novaliches Bishop Teodoro Bacani ang mga senador na dapat unahin ang paglilingkod sa mamamayan at hindi sa sinumang indibidwal.
Sa isang misa sa EDSA Shrine, dumalo ang ilang grupo at mga miyembro ng House prosecution panel na naghahangad na mapatunayang may pananagutan si Duterte.
Sa kanyang homiliya, binigyang-diin ni Bacani na bilang mga halal na opisyal, ang mga senador ay dapat kumilos para sa bayan at agad na isagawa ang impeachment trial alinsunod sa Konstitusyon.
Iginiit din niya na dapat ay hindi maantala ang proseso ng impeachment at hinimok ang Senado na tuparin ang kanilang tungkulin sa ilalim ng Saligang Batas.
Dumalo rin sa misa sina Congressmembers Leila de Lima, Joel Chua, at Lorenz Defensor na bahagi ng House prosecution panel.
Ayon kay De Lima, humihingi sila ng gabay, lakas, at karunungan upang maisulong ang kaso at mapanagot ang respondent.
Samantala, nagsagawa rin ng protesta sa labas ng EDSA Shrine ang ilang civil society groups bago ang misa, na nanawagan ng agarang pagsisimula ng impeachment trial.
Inihahanda na rin ng prosecution panel ang mga Articles of Impeachment at ang listahan ng mga testigo para sa paglilitis.
Umaasa si Congressman Joel Chua na hindi maaapektuhan ng mga tensyon sa Senado ang impeachment process at matutupad ang constitutional mandate ng mga mambabatas.
