Nakapagtala ang Pilipinas ng pinakamataas nitong marka sa Program for International Student Assessment o PISA mula nang unang lumahok sa pagsusulit noong 2018, ayon sa resulta ng PISA 2025 na inilabas nitong Martes, Setyembre 8.
Batay sa ulat ng Organization for Economic Cooperation and Development o OECD, tumaas ang marka ng mga Pilipinong mag-aaral sa tatlong pangunahing asignatura—science, mathematics at reading.
Naitala ng bansa ang average score na 373 sa science, 371 sa mathematics at 367 sa reading, mas mataas kumpara sa resulta noong 2022.
Partikular na kinilala ng OECD ang Pilipinas bilang may pinakamalaking pag-angat sa reading comprehension sa mga bansang may maihahambing na datos, matapos makapagtala ng 20 puntos na pagtaas mula sa nakaraang pagsusulit.
Ayon sa OECD, katumbas ng halos isang taong pag-aaral ang naturang pagtaas sa marka sa reading.
Sa kabila nito, nananatiling hamon ang kalidad ng edukasyon sa bansa dahil halos dalawa sa bawat tatlong Pilipinong estudyante ang hindi pa rin nakaaabot sa minimum proficiency level sa science, mathematics at reading.
Lumabas sa resulta na 36 porsyento lamang ng mga Pilipinong mag-aaral ang umabot sa Level 2, na itinuturing ng OECD bilang minimum na antas upang makapagamit ng sapat na kaalaman sa pang-araw-araw na buhay at lipunan.
Bagama’t mas mataas ito kumpara sa 2022 kung saan nasa 16 hanggang 24 porsyento lamang ang nakaaabot sa minimum proficiency, nananatili pa ring mababa ang bilang ng mga mag-aaral na may mataas na antas ng kasanayan.
Tanging 0.3 porsyento lamang ng mga kalahok mula sa Pilipinas ang nakarating sa pinakamataas na proficiency levels o Levels 5 at 6.
Sa ranggo naman ng PISA 2025, nasa ika-77 puwesto ang Pilipinas sa science, ika-74 sa mathematics at ika-72 sa reading mula sa kabuuang 91 education systems na lumahok.
Ayon kay Education Secretary Sonny Angara, bunga ng mga reporma sa kurikulum, remediation programs at pagpapalawak ng access sa teknolohiya ang pag-angat ng marka ng bansa.
Mahigit 8,000 mag-aaral mula sa 208 paaralan sa Pilipinas, kabilang ang 140 pampublikong paaralan, ang lumahok sa PISA 2025.
