Pormal nang binuksan ang selebrasyon ng Balamban Dance Festival kasabay ng ika-32 Cityhood Founding Anniversary ng Santiago City sa isinagawang programa sa City Hall Park, kahapon, Abril 25.
Nagsimula ang aktibidad sa isang banal na misa bilang pasasalamat, na sinundan ng opening program na dinaluhan ng mga opisyal ng lokal na pamahalaan at iba’t ibang sektor ng komunidad.
Bahagi ng naturang programa ang paglulunsad ng KaisaKa App, isang mobile application ng pamahalaang lungsod na layong mapalapit at mapabilis ang paghahatid ng serbisyo sa mamamayan.
Ayon kay Atty. Alyssa Sheena Tan-Dy, alkalde ng nasabing lungsod, sinabi nito na ang KaisaKa App ay isang hakbang tungo sa mas mabilis, mas transparent, at mas accessible na serbisyo para sa mga Santiagueño.
Aniya, sa pamamagitan ng naturang app ay mas mapapadali ang pakikipag-ugnayan ng publiko sa lokal na pamahalaan at mas mapapalakas ang partisipasyon ng bawat mamamayan.
Kasunod ng opening program ay isinagawa rin ang ribbon-cutting ceremony bilang hudyat ng pormal na pagbubukas ng Balamban Trade Fair sa lungsod, na tampok ang iba’t ibang lokal na produkto at negosyo.
Samantala, inaasahan ang sunod-sunod na aktibidad sa mga darating na araw bilang bahagi ng pagdiriwang na layong ipakita ang mayamang kultura, talento, at pagkakaisa ng mga Santiagueño.
