Hindi sasali sa botohan si Caloocan Representative Edgar Erice sa impeachment complaint laban kay Vice President Sara Duterte.
Ayon kay Erice, naniniwala siya na ang impeachment process ay hindi nakatuon sa accountability kundi nagiging tunggalian lamang ng dalawang malalaking political dynasty sa bansa, ang mga Duterte at Marcos.
Sinabi niya na ayaw niyang makisangkot sa tinawag niyang paligsahan ng kapangyarihan sa pagitan ng dalawang panig.
Nilinaw rin ni Erice na hindi ito nangangahulugang pinawawalang-sala niya si Duterte sa mga paratang laban dito. Ayon sa kanya, posibleng may pagkukulang ang bise presidente, ngunit mas nais niyang umiwas sa prosesong aniya ay nagiging labanan ng mga makapangyarihang pamilya sa pulitika sa halip na tunay na pagpapanagot at mabuting pamamahala.
Noong Miyerkules, natuklasan ng House justice panel ang probable cause para sa impeachment ni Duterte kaugnay ng dalawang reklamong inihain laban sa kanya, kabilang ang betrayal of public trust at culpable violation of the Constitution.
