Mahigpit na nakikipag-ugnayan ang Senado at ang Kamara sa Malacañang upang mapabilis ang pagpasa ng panukalang batas na magpapasuspinde sa excise tax ng produktong petrolyo sa gitna ng tumitinding krisis sa Gitnang Silangan na nagdudulot ng pagtaas ng presyo ng langis.
Ayon kay Senate President Vicente Sotto III, patuloy ang koordinasyon ng Senado sa tanggapan ng Executive Secretary upang ihanda ang mga panukalang batas na magpapahinto sa pagpapatupad ng excise tax sa fuel at papayag sa pag-aangkat ng biofuel upang makatulong sa pagharap sa pagtaas ng presyo ng langis.
Dagdag pa ni Sotto, tatalakayin din ng Senado ang panawagan ni Ferdinand Marcos Jr. na bigyan siya ng special powers upang pansamantalang bawasan o suspindihin ang fuel excise tax.
Samantala, sinabi ni House Speaker Faustino Dy III na nakikipag-usap din ang Kamara sa ehekutibo tungkol sa posibilidad ng pagbibigay ng emergency powers sa Pangulo.
Mahalagang aniya na magtulungan ang pamahalaan upang mabawasan ang epekto ng pagtaas ng presyo ng langis sa ekonomiya, lalo na sa mga manggagawa, commuters, magsasaka at maliliit na negosyo.
Sa New York naman, sinabi ni Claire Castro na naghahanda ang Department of Energy (DOE) ng pormal na kahilingan sa Kongreso upang bigyan ang Pangulo ng kapangyarihan na bawasan ang excise tax sa fuel.
Nagbabala rin si Castro na maaaring bawiin ang permit o kasuhan ang mga kumpanyang mapapatunayang sangkot sa mapanlinlang na gawain, kasunod ng ulat na 54 gasolinahan ang pinadalhan ng show-cause orders dahil sa maagang pagtaas ng presyo ng fuel.
Samantala, ihaharap ang mga panukalang batas sa mga komite ng Senado sa ways and means, finance at energy upang agad na pag-usapan sa pagdinig.
