Nagkaroon ng muling pagkikita sina Kris Aquino at ang kanyang mga anak na sina Josh at Bimby Aquino kay First Lady Liza Araneta-Marcos bilang bahagi ng maagang pagdiriwang ng kaarawan nito.
Sa isang social media post ng First Lady, nagpasalamat siya kina Kris, Josh at Bimby sa tatlong birthday cake na kanilang dinala bilang advance birthday gift para sa kanyang kaarawan sa ika-21 ng Agosto.
Ibinahagi rin ni Liza ang larawan ng kanilang pagkikita kung saan makikitang niyayakap siya ni Josh habang nakatayo naman sa tabi nila sina Kris at Bimby.
Bagama’t matagal nang iniuugnay sa magkasalungat na panig ng pulitika ang mga pamilyang Aquino at Marcos, mayroon umanong ugnayang pampamilya sina Kris at Liza. Ang tiyahin ni Liza na si Rosario Cacho ay asawa ni Pedro Cojuangco, nakatatandang kapatid ng yumaong dating Pangulong Corazon Aquino.
Ang muling pagkikita ay kasabay ng unti-unting pagbabalik ni Kris sa publiko matapos ang ilang taong paglayo sa showbiz, kabilang ang kanyang kamakailang paglabas sa isang proyekto.
