Arestado ang isang 43-anyos na magsasaka matapos masamsaman ng isang caliber .45 pistol at 24 na piraso ng live ammunition sa pagpapatupad ng search warrant sa Purok 6, Brgy. Esperanza East, Aurora, Isabela, ngayong Agosto 29, 2026.
Kinilala lamang ang suspek sa alyas “Dado,” may asawa, at residente ng nasabing lugar. Isinagawa ang operasyon ng magkasanib na pwersa ng CIDG Isabela PFU, bilang lead unit, at Aurora Municipal Police Station (MPS).
Ipinatupad ng mga operatiba ang Search Warrant para sa umano’y paglabag sa Section 28 ng Republic Act No. 10591, o Comprehensive Firearms and Ammunition Regulation Act. Ang warrant ay inisyu noong Agosto 28, 2026 ng Regional Trial Court, Second Judicial Region, Branch 23, Roxas, Isabela.
Sa isinagawang paghahalughog, nakumpiska ang isang Colt M1911 caliber .45 pistol, isang magazine para sa caliber .45 pistol, 24 na piraso ng live ammunition para sa caliber .45, at isang itim na sling bag. Ang mga nakumpiskang ebidensya ay isinailalim sa wastong pagmamarka at dokumentasyon.
Isinagawa ang search operation nang mapayapa, maayos, at naaayon sa batas, sa presensya ng suspek at mga halal na opisyal ng barangay.
Gumamit din ang mga operatiba ng dalawang Alternative Recording Devices (ARD) bilang bahagi ng dokumentasyon ng operasyon.
Ipinaalam sa suspek ang dahilan ng kanyang pagkakaaresto at ang kanyang mga karapatang konstitusyonal, gayundin ang kanyang mga karapatan sa ilalim ng RA 9745 o Anti-Torture Act of 2009, sa wikang kanyang nauunawaan. Ang suspek at mga nakumpiskang ebidensya ay dinala sa CIDG Isabela PFU para sa booking, dokumentasyon, at pagsasagawa ng kaukulang legal na proseso bago ang paghahain ng nararapat na kaso sa korte.
