Inatasan ni Philippine National Police (PNP) Chief Gen. Jose Melencio C. Nartatez Jr. ang lahat ng yunit ng pulisya na magsagawa ng huling pagsusuri sa seguridad bilang paghahanda sa ikalimang State of the Nation Address (SONA) ni Pangulong Ferdinand Marcos Jr. sa Hulyo 27.
Ayon sa PNP, mahigit 20,000 pulis ang ipapakalat sa paligid ng Batasang Pambansa sa Quezon City upang tiyakin ang maayos at ligtas na pagdaraos ng SONA. Tutulong din sa seguridad ang Armed Forces of the Philippines (AFP), Metropolitan Manila Development Authority (MMDA), at mga lokal na pamahalaan para sa pagpapatupad ng traffic management.
Sinabi ni Gen. Nartatez na nakahanda rin ang karagdagang bilang ng mga pulis na magsisilbing standby personnel bilang bahagi ng security protocol upang matiyak ang mabilis na pagtugon sa anumang posibleng insidente.
Ayon sa opisyal, nasa huling yugto na ang koordinasyon, rehearsal, at deployment ng mga yunit na lalahok sa seguridad ng SONA upang matiyak na magiging ligtas, maayos, at mapayapa ang okasyon.
Inaasahan namang dadalo sa Batasang Pambansa ang libu-libong kalahok kabilang ang mga opisyal ng pamahalaan, mga inimbitahang panauhin, miyembro ng diplomatic corps, media organizations, at iba’t ibang cause-oriented groups.
Bahagi rin ng security preparations ang crowd management dahil inaasahang magsasagawa ng mga kilos-protesta ang mga grupong sumusuporta at tumututol sa administrasyon.
Kabilang sa mga karaniwang lugar ng pagtitipon ng mga demonstrador ang Quezon Memorial Circle, Philcoa, Mendiola, at Commonwealth Avenue hanggang sa bahagi ng Sandiganbayan.
Pinaalalahanan ni Gen. Nartatez ang lahat ng pulis na pairalin ang pinakamataas na antas ng pagpipigil, manatiling propesyonal sa lahat ng oras, at igalang ang karapatan ng bawat Pilipino sa mapayapang pagtitipon.
Dagdag pa niya, patuloy ang pakikipag-ugnayan ng PNP sa iba pang ahensya ng pamahalaan at mga lokal na pamahalaan upang matiyak ang maayos na pagpapatupad ng seguridad at traffic management sa araw ng SONA.
Binigyang-diin din ng PNP chief na kasabay ng pagpapanatili ng seguridad ay ang paggalang sa karapatang sibil ng bawat mamamayan na malayang maipahayag ang kanilang saloobin alinsunod sa batas.
