Nagkaisa at taimtim na nakibahagi ang mahigit 400 na mga Muslim sa Santiago City sa pagdiriwang ng Eid’l Adha kung saan naging sentro ang panalangin para sa kapayapaan, pagkakaisa, at pagkakabuklod ng komunidad.
Sa panayam ng Bombo Radyo Cauayan kay Imam Abdulfatah Adoma, ipinaabot nito na ang Eid’l Adha at Eid’l Fitr ang dalawang pinakadakilang kapistahan sa Islam na nagsisilbing sandigan ng pananampalataya, pasasalamat, at espirituwal na pagpapanibago ng mga Muslim.
Ayon kay Imam Adoma, sinimulan ang pagdiriwang sa sama-samang pananalangin at makabuluhang sermon sa moske kung saan binigyang-diin ang kahalagahan ng pananampalataya, pagkakapatiran, at kolektibong pagkakaisa sa gitna ng mga hamon ng lipunan. Sinundan ito ng salu-salo bilang sagisag ng pagbabahaginan, malasakit, at matibay na ugnayan ng komunidad
Inilahad din ni Imam Adoma na kabilang sa kanilang taimtim na panalangin ang pagsusulong ng pangmatagalang kapayapaan, pagkakaunawaan, at paglayo sa anumang uri ng sigalot upang mapanatili ang maayos at nagkakaisang pamayanan.
Ang Eid’l Adha o “Feast of Sacrifice” ay paggunita sa dakilang sakripisyo at hindi matatawarang pananampalataya ni Propeta Ibrahim sa Allah. Higit pa sa isang relihiyosong pagdiriwang, ito ay sumasalamin sa diwa ng pagsasakripisyo, pagkakawanggawa, at pagpapalalim ng pananampalataya at pagkatao ng bawat Muslim.
