Nasa kamay na ni Pangulong Ferdinand Marcos Jr. kung sino ang pipiliin nitong susunod na Punong Mahistrado kapag nakapagretiro na si Chief Justice Alexander Gesmundo.
Si Gesmundo ay na-appoint noong April 5, 2021 at nakatakdang mag-retire sa November 6, 2026 matapos maabot ang mandatory retirement age na 70.
Sa panayam ng Bombo Radyo Cauayan kay Atty. Christian Gonzales, Dura lex sed lex guest lawyer at isang law professor/lecturer, sinabi nitong mayroon nang limang kandidato na na-short list ang Judicial and Bar Council (JBC) na maaaring pumalit bilang chief justice.
Ito ay kinabibilangan nina Senior Associate Justice Marvic Mario Victor F. Leonen, Associate Justice Alfredo Benjamin S. Caguioa, Associate Justice Rodil Zalameda, Associate Justice Japar Dimaampao, at Associate Justice Jose Midas Marquez.
Batay sa Article VIII, Section 9 ng 1987 Philippine Constitution, bahagi ng kapangyarihan ng Pangulo ng Pilipinas na pumili at magtalaga ng susunod na Punong Mahistrado.
Ayon kay Gonzales, hindi kinakailangang galing sa Supreme Court ang susunod na Punong Mahistrado basta’t siya ay abogado, may at least 15 years na practice sa law, Filipino Citizen, at may proven competence, integrity, probity, at intelligence.
Iginiit nito na lahat ng limang shortlisted ng JBC ay dumaan sa rigorous process para maging qualified na maging susunod na Chief Justice ng Pilipinas.
