Inilipat sa Philippine General Hospital (PGH) si dating House Speaker at Leyte 1st District Representative Martin Romualdez nitong Sabado, Setyembre 12, para sa isang independent medical assessment na iniutos ng Sandiganbayan.
Layunin ng pagsusuri na beripikahin ang mga naunang medical findings ng mga pribadong doktor ni Romualdez na nagsabing mayroon itong mga kondisyong pangkalusugan na nangangailangan ng pananatili sa ospital.
Nauna nang ipinag-utos ng Sandiganbayan ang paglipat ni Romualdez mula sa Cardinal Santos Medical Center patungo sa PGH upang magkaroon ng hiwalay at obhetibong pagsusuri sa kanyang kalagayan.
Ayon sa ulat, dinala si Romualdez sakay ng wheelchair at inilipat sa ikapitong palapag ng PGH.
Sinabi ni UP College of Medicine associate professor at pediatric neurosurgeon Dr. Ronnie Baticulon na matatagpuan sa ikapitong palapag ng ospital ang ilan sa mga private room ng PGH para sa mga pasyenteng nagbabayad.
Gayunman, wala pang inilalabas na impormasyon ang PGH kung saang partikular na kuwarto o pasilidad nananatili si Romualdez habang isinasagawa ang kanyang medical assessment.
Nahaharap si Romualdez sa kasong plunder kaugnay ng umano’y iregularidad sa mga flood control projects at kasalukuyang hinihintay ang resulta ng pagsusuri na isusumite ng PGH sa Sandiganbayan.
