Suportado ng Philippine National Police (PNP) ang panukala ng Department of Education (DepEd) na dagdagan ang bilang ng guidance counselors sa mga paaralan.
Ayon kay PNP Chief Gen. Jose Melencio Nartatez Jr., mahalaga ang papel ng mga guidance counselor sa pagbibigay ng maagang interbensyon at pagtiyak sa kapakanan ng mga estudyante, habang ang mga pulis naman ay tutulong sa pagpapanatili ng ligtas na kapaligiran sa loob at labas ng mga paaralan.
Binigyang-diin din niya ang patuloy na pakikipagtulungan ng PNP sa mga paaralan, lokal na pamahalaan, at komunidad upang maprotektahan ang mga mag-aaral at maiwasan ang mga banta bago pa man ito mangyari.
Bilang bahagi ng suporta sa inisyatiba, inatasan ni Nartatez ang lahat ng Women and Children Protection Desks (WCPDs) na palakasin ang mga kampanya ng impormasyon laban sa bullying, pang-aabuso sa bata, pagsasamantala, karahasan, at mga panganib sa internet, sa pakikipag-ugnayan sa mga paaralan at iba pang katuwang sa komunidad.
Inatasan din ang PNP Anti-Cybercrime Group na palawakin pa ang mga cyber safety lecture para sa mga estudyante, guro, at school personnel upang mas mapalakas ang kanilang kakayahang matukoy ang mga banta at maiwasan ang mga krimeng maaaring isagawa gamit ang teknolohiya.
