Tiniyak ng United Kingdom ang patuloy nitong suporta sa Ukraine matapos magbabala ang Russia ng posibleng “kahihinatnan” kasunod ng kumpirmasyon na ginamit ng Kyiv ang mga drone na gawa sa UK sa mga pag-atake sa loob ng teritoryo ng Russia.
Ayon kay UK Prime Minister Andy Burnham, mananatiling kaagapay ng Britain ang Ukraine at patuloy itong magbibigay ng suporta upang maprotektahan ng bansa ang sarili laban sa pananakop ng Russia.
Nauna rito, inakusahan ng Russian Embassy sa London ang UK na lalo umanong nagpapalala sa sigalot sa Ukraine at nagbabala na may kapalit ang mas malalim na pakikilahok nito sa digmaan.
Pinalakas ng Ukraine ang mga pag-atake nito sa loob ng Russia, kabilang ang mga oil refinery, bodega at iba pang pasilidad na mahalaga sa ekonomiya ng bansa. Kinumpirma rin ng isang military source na ginamit sa ilan sa mga naturang operasyon ang mga drone na gawa sa Britain.
Samantala, nagpapatuloy ang palitan ng mga pag-atake ng Russia at Ukraine. Ayon sa mga opisyal ng Ukraine, 17 katao ang nasawi sa pinakahuling missile strikes ng Russia, kabilang ang 10 residente ng isang nayon sa hilagang-silangang bahagi ng bansa.
Sa kabila ng tumitinding tensyon, nanindigan ang UK na magpapatuloy ang suporta nito sa Ukraine habang nagpapatuloy ang digmaan na nagsimula noong 2022.
