Naging mapayapa ang pagsisimula ng pagdiriwang ng Gawagaway-yan Festival sa Lungsod ng Cauayan.
Pormal na nagsimula kahapon, Marso 30 ang nasabing pagdiriwang na magtatagal hanggang Abril 13.
Sa panayam ng Bombo Radyo Cauayan kay Public Order and Safety Division Chief Pilarito Mallillin, sinabi niya na mayroon silang tatlong unified command unit na nagmamando sa lahat ng nakahanay na aktibidad kaya naman naging maayos ang pagsasagawa sa mga ito.
Aniya, wala namang naitalang labis na pagsikip ng daloy ng trapiko lalo na at natapos na ang konstruksyon ng ilang kalsada bago magsimula ang Gawagaway-yan Festival.
Wala rin umanong naitalang problema sa isinagawang konsyerto kagabi dahil disiplinado ang mga nagsidalo at wala silang nahuli na mga indibidwal na nanggugulo.
Umaasa naman siya na walang maitalang anumang hindi kanais-nais na insidente hanggang sa matapos ang naturang pagdiriwang.
Mahigpit din nila ipinatupad ang traffic scheme sa bahagi ng Sports complex kung saan isinagawa ang naturang konsyerto upang hindi mag-build up ang traffic sa naturang lugar.
