CAUAYAN CITY – Nasugatan ang batang anak habang kalunus-lunos ang pagkamatay ng isang ama matapos na mabangga ng trailer truck ang minamanehong motorsiklo habang binabagtas ang national highway dakong alas onse kagabi sa Sinippil, Reina Mercedes, Isabela.
Ang namatay ay si Jeffrey Belgado, 35 anyos, tsuper ng motorsiklo habang nasugatan ang kanyang anak na si Miguel Belgado, 9 anyos, kapwa residente ng Dangan, Reina Mercedes, Isabela.
Matapos mabangga ang motorsiklo ay nasagasaan ng trailer truck si Jeffrey at tinamaan ang kanyang ulo na naging sanhi ng agad niyang pagkamatay.
Lumabas sa pagsisiyasat ng Reina Mercedes Police Station na binabagtas ng motorsiklo ang national highway patungong timog nang makarating sa pinangyarihan ng aksidente ay nabangga ito ng sumusunod na trailer truck.
Sa halip na huminto ay tumakas ang trailer truck ngunit nahabol ng mga kasapi ng Reina Mercedes Police Station sa Alinam, Cauayan City sa kanilang isinagawang hot pursuit operation.
