CAUAYAN CITY – Nasawi ang isang binata matapos mabangga ng van ang minamaneho nitong motorsiklo sa District 1, Cauayan City.
Ang biktima ay si Daryl Bajade, 19-anyos, binata, at residente ng Maligaya, Cauayan City habang ang van ay minaneho ni James Gannaban, 39-anyos, may asawa, at residente ng Sisim Alto, Tumauini, Isabela.
Batay sa pagsisiyasat ng pulisya, binabagtas ng biktima ang daan patungo sa timog habang ang van ay binabagtas ang kasalungat na direksyon.
Nakapasok umano ang biktima sa kasalungat na linya kaya nasalpok ng van.
Nagtamo ang biktima ng matinding sugat sa iba’t ibang bahagi ng katawan partikular sa ulo na isinugod pa sa pagamutan ng mga rumespondeng miyembro ng Rescue 922 ngunit idineklara ng dead on arrival.
Sa ngayon ay nasa pangangalaga ng Cauayan City Police Station si Gannaban maging ang mga sangkot na sasakyan para sa imbestigasyon.
