CAUAYAN CITY – Handang harapin ng isang lolo ang isasampa sa kanyang kaso matapos niyang saksakin ang isang ginang sa San Mateo, Isabela.
Ang pinaghihinalaan ay si Laureto Tumamao, 66-anyos habang ang biktima ay si Rodalia Sabban, 55-anyos, biyuda, at kapwa residente ng Gaddanan, San Mateo, Isabela.
Una rito ay inanyayahan ang dalawa sa barangay hall ng kanilang barangay upang mag-usap dahil sa ginawa ng suspek na tinanggalan niya ng hangin ang motorsiklo ng biktima.
Noong nasa barangay hall na sila ay pinagsasaksak niya ang biktima ng icepeak.
Nakatakbo naman ang ginang pero may natamo pa rin siyang sugat sa kanyang likod.
Inaresto naman ng mga opisyal ng barangay ang suspek at ipinasakamay sa pulisya habang dinala sa isang pagamutan sa bayan ng San Mateo ang biktima subalit inilipat din sa ibang pagamutan sa Santiago City.
Si Tumamao ay mahaharap sa kasong frustrated murder.
