CAUAYAN CITY- Nasawi ang isang tricycle driver sa banggaan ng tricycle at trailer truck sa kahabaan ng National Highway Cabatuan Road, San Fermin, Cauayan City.
Sa nakuhang impormasyon ng Bombo Radyo Cauayan sa Cauayan City Police Station ang nasawi ay kinilalang si Jun Baddungon, 42-anyos habang sugatan naman ang sakay nitong si Marcelo Baddungon , 44-anyos na kapwa residente ng Brgy. Turod, Reina Mercedes, Isabela.
Kinilala naman ang tsuper ng trailer truck na si John Michael Maderia, 35-anyos at residente ng Brgy. Nicolas Agatep, Lasam, Cagayan.
Batay sa inisyal na imbestigasyon ng pulisya patungong Cauayan City Proper ang tricycle habang ang trailer truck naman ay patungong Luna Isabela.
Nang makarating sa lugar na pinangyarihan ng insidente ay nag over take ang tricycle sa sinusundan nitong isa pang tricycle at habang nasa proseso ng pag-overtake ay nabangga ito ng paparating na trailer truck.
Nagtamo ng head injury ang Tricycle Driver na si Jun habang nagtamo naman sugat sa iba’t ibang bahagi ng katawan ang sakay nito.
Agad naman silang isinugod sa pagamutan ngunit idineklarang dead on arrival ang tsuper.
Sa ngayon ay hinihintay pa ang pag-uusap ng dalawang panig para sa pagsasampa ng kaukulang kaso.
