Naitala ng Bangko Sentral ng Pilipinas (BSP) na mas mataas ang bahagi ng bad loans o mga utang na hindi nababayaran nang tama sa kabuuang portfolio ng mga bangko sa bansa ngayong Enero, senyales na ilan sa mga borrower ay naramdaman ang epekto ng pagtaas ng gastusin matapos ang holiday season.
Batay sa datos ng BSP, ang non-performing loans (NPL) o mga utang na overdue nang hindi bababa sa 90 araw at nanganganib na hindi mabayaran, ay umabot sa 3.31 porsyento ng kabuuang loan portfolio ng industriya. Ito ang pinakamataas na gross NPL ratio mula noong Nobyembre 2025, nang umabot ito sa 3.32 porsyento.
Sa halaga, tinatayang P550.8 bilyon ng kabuuang P16.6 trilyong pautang ng sektor ang napasama sa bad loans sa unang buwan ng taon. Mas mataas ito ng 7.4 porsyento kumpara noong nakaraang taon at halos 5 porsyento na higit sa antas noong Disyembre.
Bagama’t tumaas ang bad loans, may sapat pa ring pondo ang mga bangko para sa posibleng pagkalugi. Nakatabi ang mga bangko ng halos P519 bilyon bilang allowance para sa potential credit losses, na tumutugma sa 94.21 porsyentong coverage ratio. Gayunpaman, ito ang pinakamababang antas ng provisioning mula noong Setyembre 2025, nang masaklaw nito ang 93.85 porsyento ng NPLs.
