Bumagsak ang Philippine peso sa panibagong record low na ₱61.30 kada US dollar nitong Martes, unang pagkakataon na lumampas sa ₱61-per-dollar level.
Ayon sa datos ng Bankers Association of the Philippines alas-4 ng hapon, ito na ang pinakamahinang pagtatapos ng piso, halos 60 sentimos na mas mababa kaysa sa dating record na ₱60.748 noong Marso 31. Nagsimula ang araw sa ₱60.8 ang piso.
Matatandaang lumampas na sa ₱60 ang piso mahigit isang buwan na ang nakalipas, ngunit pansamantalang nakabawi noong Abril 8 nang umakyat sa ₱59.43 matapos magkasundo ang US at Iran sa dalawang linggong ceasefire at muling buksan ang Strait of Hormuz. Gayunman, muling bumagsak ang piso nang mabigo ang mga peace talks at muling tumaas ang presyo ng langis.
Noong nakaraang linggo, nagpatupad ang Bangko Sentral ng Pilipinas (BSP) ng sorpresa na 25-basis-point rate hike sa 4.5% — ang unang pagtaas sa loob ng dalawang taon. Inaasahan na ngayon ng BSP na aabot sa 6.3% ang average inflation ngayong taon, mas mataas sa dating forecast na 5.1%.
Nagbabala si BSP Governor Eli Remolona na maaaring manatili sa higit 5% ang inflation sa buong 2026 at nagbigay ng pahiwatig ng posibleng karagdagang rate hikes.
