Inanunsyo ng militar ng Iran ang pansamantalang pagsuspinde ng kanilang mga retaliatory strikes laban sa mga U.S. at allied military targets.
Ayon kay Major General Mohammad Akraminiya, tagapagsalita ng militar ng Iran, nananatiling depensibo at bilang tugon lamang sa mga pag-atake ang kanilang estratehiya.
Sinabi ni Akraminiya na nagpasya ang Tehran na bawasan muna ang kanilang mga operasyong militar matapos ang ikalawang magkasunod na gabi na walang naitalang panibagong airstrike ng Estados Unidos sa teritoryo ng Iran.
Dahil dito, pansamantala umanong humupa ang tensyon sa pagitan ng Iran at ng mga kaalyado ng Amerika sa rehiyon.
Gayunman, nilinaw ng mga opisyal ng Iran na nananatili silang handang tumugon sakaling muling magkaroon ng mga pag-atake laban sa kanilang bansa.
Bagama’t itinuturing na hakbang tungo sa pagbaba ng tensyon ang naturang anunsyo, patuloy pa ring binabantayan ng international community ang sitwasyon dahil nananatiling marupok ang seguridad sa Gitnang Silangan.
Wala pang opisyal na pahayag mula sa pamahalaan ng Estados Unidos kaugnay sa anunsyo ng Iran sa oras na ito.
