Patay ang 29-anyos na driver at sugatan naman ang kanyang 39-taong gulang na pinsan matapos na mahulog ang kanilang SUV sa matarik na bangin sa Barangay Ampucao, Itogon, Benguet kahapon madaling araw.
Sa imbestigasyon ng Itogon Police, galing sa lamay ang magpinsan at pauwi na sana sila sa Sitio Santa Fe ng nasabi ring barangay nang mangyari ang aksidente.
Hindi umano nakontrol ng driver ang sasakyan sa kurbadang bahagi ng kalsada at nahulog sa may 80-metrong lalim na bangin ang SUV na parang latang nayupi pagbagsak sa baba.
Unang naihaon ang pasahero na nagtamo ng sugat sa katawan na agad dinala sa ospital pero ang driver ay hindi na naisalba pa ang buhay
Inaalam pa kung nakainom o nasa impluwensya ng alak ang dalawa bagama’t walang nakikitang foul play sa trahedya.
