Magpapakalat ang Philippine National Police (PNP) ng 72,500 pulis sa buong bansa upang matiyak ang seguridad at mapanatili ang kaayusan sa paggunita ng Undas 2026.
Ayon sa PNP, tututok ang mga tauhan nito sa pamamahala ng trapiko, pagtulong sa mga pasahero at bisita, pagpapanatili ng kaayusan sa mga pampublikong lugar at pagtugon sa mga emergency.
Saklaw ng operasyon ang 5,311 sementeryo, memorial park at columbarium, gayundin ang mga transport hub, pangunahing lansangan, simbahan, pasyalan, checkpoint at iba pang lugar na inaasahang dadagsain ng publiko.
Nagtalaga rin ang pulisya ng 4,980 police assistance desk sa mga sementeryo at columbarium upang mapadali ang paghingi ng tulong at pag-uulat ng mga insidente.
Makikiisa rin sa operasyon ang 16,892 tauhan mula sa iba pang ahensya ng pamahalaan, kabilang ang Armed Forces of the Philippines, Bureau of Fire Protection at Philippine Coast Guard, gayundin ang 51,467 community force multiplier gaya ng mga barangay tanod at radio group.
Dahil dito, tinatayang aabot sa 141,000 ang kabuuang bilang ng mga lalahok sa seguridad sa buong bansa.
Pinayuhan naman ng PNP ang publiko na sundin ang mga patakaran sa mga sementeryo at iwasang magdala ng mga ipinagbabawal na bagay gaya ng baril, armas, ilegal na droga, alak na ipinagbabawal sa lugar at mga materyales na madaling magliyab.
Pinayuhan din ang mga bibiyahe na tiyaking ligtas ang kanilang mga tahanan bago umalis, suriin ang kondisyon ng sasakyan at iwasang magmaneho kapag pagod o nakainom.
Hinimok din ang publiko na agad ipagbigay-alam sa pinakamalapit na himpilan ng pulisya o police assistance desk ang anumang emergency o kahina-hinalang aktibidad.
