Bumati na lamang ng magandang kapalaran si Senate Minority Leader Alan Peter Cayetano kay Senador Mark Villar matapos itong lumipat mula sa minorya patungo sa mayorya ng Senado.
Sa pahayag na inilathala niya sa Facebook nitong Huwebes, Oktubre 8, hiniling ni Cayetano ang patuloy na paggabay ng Diyos kina Villar at sa iba pang senador upang magampanan nila nang maayos ang kanilang tungkulin sa bayan.
Kinumpirma ni Senate Majority Leader Juan Miguel Zubiri ang paglipat ni Villar sa mayorya. Nahalal din si Villar bilang chairman ng Senate Committee on Public Works, kapalit ni Senate President Pro Tempore Vicente “Tito” Sotto III. Naging miyembro rin siya ng Commission on Appointments, kapalit ni Zubiri.
Sa kabila ng pagbabago sa alyansa, tiniyak ni Cayetano na mananatiling matatag ang tungkulin ng minorya bilang tagasuri ng mga hakbang ng pamahalaan at bilang konstruktibong oposisyon.
Ayon kay Cayetano, nauunawaan nila ang mga dahilan sa likod ng pagbabago ng mga alyansang pampolitika. Aniya, mula pa noong Mayo 11, naging malinaw ang kahalagahan para sa administrasyon na mapanatili ang mayoryang kaalyado nito sa Senado.
Naalala rin ni Cayetano na naging Senate President siya noong Mayo 11 matapos maagaw ng kanilang grupo ang puwesto kay Sotto. Gayunman, isang araw lamang siyang nanatili sa posisyon bago siya pinalitan kinabukasan ni Senador Sherwin Gatchalian, ang kasalukuyang Senate President.
Binigyang-diin ni Cayetano na anuman ang pagbabago sa alyansa at kalagayang pampolitika, hindi magbabago ang tungkulin ng mga senador na panindigan ang tama, pangalagaan ang mga institusyon at maglingkod para sa kapakanan ng bansa.
