Nakatuon ngayon sa puspusang pagsasanay si EJ Obiena bilang paghahanda sa kanyang pagbabalik sa outdoor season, na inaasahang sisimulan niya sa unang linggo ng Hunyo.
Ayon kay Obiena, pinili niyang ipagpaliban ang pagsabak sa mga unang kompetisyon upang magkaroon ng sapat na panahon para maibalik ang kanyang porma at muling makapasok sa mataas na ranggo ng world pole vault.
Mula sa dating world No. 2, bumaba sa ika-12 puwesto ang Filipino pole vaulter, ngunit determinado siyang makabawi sa darating na mga torneo.
Ayon naman sa kanyang adviser na si Jim Lafferty, target ni Obiena na makasali sa ilang events ng Diamond League ngayong taon.
Dagdag pa ni Lafferty, mataas ang motibasyon ng atleta at nasa maayos na kondisyon, lalo na’t natugunan na ang kanyang naging problema sa likod. Bagama’t may ilang minor na pananakit dulot ng matagal na karera, naniniwala siyang magiging maganda ang takbo ng season ni Obiena.
Sa kasalukuyan, nananatili si Obiena sa Formia upang mag-focus sa “loading phase” ng kanyang training—nakatuon sa pagpapalakas at pagpapabilis, bago unti-unting bumalik sa aktwal na pagtalon.
Kasama ang kanyang coach na si Vitaly Petrov, pinagkasunduan nilang bigyan ng sapat na panahon ang atleta para sa maayos na buildup matapos ang sunod-sunod na kompetisyon noong nakaraang taon.
Ipinaliwanag ni Lafferty na halos walang pahinga si Obiena noon dahil agad itong sumabak mula SEA Games hanggang indoor competitions, kaya’t hindi nabigyan ng sapat na oras para sa training.
Dahil dito, plano nilang laktawan ang unang bahagi ng outdoor season at ituon ang pansin sa ensayo.
Umaasa ang kampo ni Obiena na sa pamamagitan ng anim na linggong tuloy-tuloy na training, maibabalik nito ang kanyang dating porma at muling makikipagsabayan sa mga pinakamahusay sa mundo.
