Nagsimula ang tatlong araw na pansamantalang pagtigil sa pagbebenta ng sariwang karne ng baboy ng ilang hog traders nitong Huwebes bilang protesta sa pagdami ng imported na frozen pork na umano’y nakaaapekto sa lokal na industriya.
Ayon kay Pork Producers Federation of the Philippines chairperson at AGAP Party-list Representative Nicanor Briones, umaabot sa ₱350 milyon kada araw ang pagkalugi ng industriya, o katumbas ng ₱7,000 kada ulo ng baboy, dahil sa kompetisyon mula sa imported na karne.
Gayunman, nanatiling normal ang bentahan sa ilang pamilihan, kabilang ang Balintawak Market, Marikina Public Market at ilang palengke sa Pangasinan, dahil may mga trader na hindi lumahok sa tigil-bentahan.
Samantala, sinabi ng Department of Agriculture na pinag-aaralan nito ang pansamantalang pagsususpinde sa pag-aangkat ng baboy sa loob ng dalawang buwan simula Nobyembre 2026. Nakikipag-ugnayan din ang ahensya sa Tariff Commission upang maibalik ang dating taripa sa imported na baboy.
