Sinibak sa puwesto si Katie Zacharia bilang White House press secretary matapos ang wala pang isang linggo, kasunod ng mga batikos sa kaniyang unang press briefing at mga tanong hinggil sa kaniyang kwalipikasyon bilang abogado, ayon sa dalawang opisyal ng administrasyon ni US President Donald Trump.
Ayon sa mga opisyal, aalis na si Zacharia sa naturang posisyon matapos ang sunod-sunod na kontrobersiya sa kaniyang mga unang araw bilang pangunahing tagapagsalita ng pangulo.
Nauna nang sinabi ni Trump na hiniling niya kay Zacharia na pag-isipan kung ipagpapatuloy pa nito ang trabaho. Sinabi ng pangulo na hindi madali ang pagiging tagapagsalita ng White House at iminungkahi niyang muling pag-isipan ni Zacharia ang kaniyang pananatili sa puwesto.
Nagsimula si Zacharia noong Lunes at nagsagawa ng kaniyang unang press briefing kinabukasan. Itinalaga siya bilang kapalit ni Karoline Leavitt, matapos umanong hangarin ni Trump na magkaroon ng tagapagsalitang mas epektibong makapagpapalaganap ng mga nagawa ng kaniyang administrasyon.
Naging sentro rin ng kontrobersiya ang pahayag ni Zacharia na mayroon siyang karanasan sa international transaction law. Gayunman, wala umanong nakitang rekord na nagpapatunay na lisensiyado siyang abogado sa alinmang estado ng Estados Unidos o sa District of Columbia.
Sa isang panayam nitong Huwebes, inamin ni Zacharia na hindi siya nakapasa sa bar examination. Sa Estados Unidos, kailangang matanggap bilang miyembro ng state bar bago legal na makapagsanay bilang abogado.
Siya ay nagbitiw sa puwesto mahigit dalawang linggo bago ang midterm elections sa Nobyembre, isang mahalagang panahon para sa administrasyong Trump na itampok ang mga nagawa nito at tulungan ang mga kapwa Republicans na mapanatili ang kontrol sa Kongreso.
Sinabi ni Trump na hindi siya nagmamadaling magtalaga ng kapalit ni Zacharia.
Dahil sa mabilis na pag-alis, pinaniniwalaang si Zacharia ang may pinakamaikling panunungkulan sa kasaysayan bilang White House press secretary.
