Sabay na umusad ang dalawang malalaking usapin na kinasasangkutan ng pamilya Duterte kahapon, Abril 22, matapos tutukan ng Kamara ang impeachment complaint laban kay Vice President Sara Duterte habang nagpatuloy rin ang pag-usad ng kasong crimes against humanity laban kay dating Pangulong Rodrigo Duterte sa International Criminal Court (ICC).
Sa pagdinig ng House Committee on Justice, tinalakay ang mga alegasyon ng umano’y hindi maipaliwanag na yaman ng bise presidente at kakulangan sa tamang pagdedeklara ng kanyang Statement of Assets, Liabilities and Net Worth (SALN). Isinumite ng Office of the Ombudsman sa komite ang kopya ng SALN ni VP Sara Duterte mula 2007 hanggang 2024, at kinumpirma ng isang opisyal ng Ombudsman ang pagiging totoo ng mga nakasaad dito.
Lumabas din sa pagdinig ang ulat na tumaas ng mahigit 1,000 porsyento ang net worth ng bise presidente mula 2007 hanggang 2024, mula sa P7.2 milyon ay umabot sa P88.51 milyon. Napansin din ng mga miyembro ng komite na mula 2019 ay hindi na umano nagdeklara si VP Sara ng cash on hand sa kanyang SALN kahit patuloy ang pagtaas ng kanyang yaman.
Ayon sa Anti-Money Laundering Council (AMLC), natukoy ang 630 covered transactions at 33 suspicious transactions na may kabuuang halagang umabot sa P6.77 bilyon na kinasasangkutan umano ni VP Sara Duterte at kanyang pamilya. Ayon pa sa ulat, nasa P4.4 bilyon ang pumasok sa mga account, P1.5 bilyon ang lumabas, at may humigit-kumulang P791 milyon na hindi matukoy kung inflow o outflow.
Kinumpirma rin ng AMLC na ang mga transaksyong sinuri ng ilang mambabatas ay tumugma sa kanilang records, na nagpatibay sa mga naunang ulat tungkol sa mga financial movement na konektado sa pamilya Duterte.
Samantala, sa ICC sa The Hague, pinagtibay ng Appeals Chamber ang hurisdiksyon ng korte sa kaso laban kay dating Pangulong Duterte kaugnay ng umano’y mga pagpatay sa ilalim ng war on drugs ng kanyang administrasyon. Tinanggihan ng korte ang apela ng kampo ng dating pangulo, dahilan para magpatuloy ang paglilitis.
Ayon sa mga human rights lawyer at ilang grupo, ang desisyon ng ICC ay itinuturing na tagumpay ng mga biktima ng war on drugs at hakbang patungo sa pananagutan. Sinabi rin ng Makabayan bloc na ang sabay na pag-usad ng mga isyu laban sa mag-amang Duterte ay indikasyon na papalapit na ang paniningil ng batas at ng publiko.
Habang patuloy ang mga imbestigasyon at paglilitis, nananatiling bukas ang epekto nito sa posisyon at planong pampulitika ng mga Duterte sa hinaharap, kabilang ang usapin ng impeachment at pananagutan sa internasyonal na korte.
