Umasa ang pamahalaan sa patuloy na pag-aangkat ng coal upang matiyak ang matatag at sapat na suplay ng kuryente sa gitna ng lumalalang krisis sa langis sanhi ng tensyon sa Middle East.
Ayon kay Pangulong Ferdinand Marcos Jr., bagama’t layunin ng bansa na unti-unting lumipat sa renewable energy, kailangan munang palakasin ang coal imports upang hindi magkulang ang fuel ng mga power plant.
Sa kasalukuyan, umaabot sa 40.6% ng kuryente sa bansa ang nagmumula sa coal-fired power plants, na karamihang pinapakain ng imported coal, kung saan 98% nito ay nagmumula sa Indonesia.
Dahil mas mura at mas stable ang coal kumpara sa ibang energy sources, inaasahang mananatili itong pangunahing bahagi ng energy mix, kahit may target ang pamahalaan na itaas ang renewable energy share sa 35% pagsapit ng 2030.
Gayunman, inaasahang tataas pa ang demand sa coal sa mga susunod na taon, na tinatayang aabot sa 54 milyong tonelada pagsapit ng 2030, ayon sa International Energy Agency. Ipinapakita rin ng datos na higit 80% ng coal requirement ng bansa ay inaangkat, na nagpapatunay sa patuloy na dependency sa imported fuel.
Kasabay nito, naghahanap din ang pamahalaan ng alternatibong pinagkukunan ng langis habang naapektuhan ang global supply chain, kabilang ang pag-secure ng karagdagang fuel reserves at pakikipag-ugnayan sa iba’t ibang bansa para sa supply agreements.
Tiniyak naman ng Pangulo na may sapat na suplay ng enerhiya at pagkain ang bansa, at patuloy ang hakbang ng pamahalaan upang maibsan ang epekto ng pagtaas ng presyo ng langis sa mamamayan, kabilang ang pagbibigay ng subsidiya sa transport sector at pansamantalang pagsuspinde sa fare hike.
