Inanunsyo ni Pangulong Ferdinand Marcos Jr. ang malaking pagpapalawak ng maternity benefits ng PhilHealth na epektibo simula Abril 30, 2026, na layuning bawasan ang gastusin ng mga pamilyang Pilipino at tiyakin ang mas ligtas na panganganak.
Sa ilalim ng bagong benepisyo, tataas ang coverage para sa normal delivery mula ₱9,750 patungong ₱29,000, habang ang cesarean section ay aabot sa ₱58,000 hanggang ₱62,000 mula sa dating ₱37,000.
Palalawakin din ang prenatal care mula apat hanggang walong check-ups, kabilang ang mga laboratory tests at bakuna, habang magkakaroon din ng tatlong libreng postnatal check-ups.
Layunin ng programa na gawing halos libre o mas abot-kaya ang panganganak, lalo na para sa mga nasa ward accommodation.
Dagdag pa rito, magbibigay ang pamahalaan ng ₱350 buwanang allowance para sa mga buntis na kabilang sa 4Ps sa ilalim ng “First 1,000 Days” program upang mapabuti ang nutrisyon at kalusugan ng ina at sanggol.
