Sumampa na sa mahigit $100 kada bariles ang presyo ng langis sa pandaigdigang merkado nitong Huwebes kasunod ng panibagong tensyon sa Gitnang Silangan, na maaaring magdulot ng pagtaas sa presyo ng petrolyo at iba pang pangunahing bilihin sa mga bansang umaasa sa imported na langis gaya ng Pilipinas.
Umakyat ng pitong porsiyento ang presyo ng Brent North Sea crude matapos iulat ang mga pag-atake ng Iran-backed Houthi rebels sa mga barkong dumaraan sa Red Sea, na nagpalala sa pangamba sa suplay ng langis sa buong mundo.
Kasunod nito, nagbanta si US President Donald Trump ng matinding aksyong militar laban sa Houthis, habang iginiit naman ng Iran na magpapatuloy ang kanilang mga operasyon hangga’t nagpapatuloy ang opensiba ng Estados Unidos laban sa kanila.
Ayon sa mga analyst, ang patuloy na pagtaas ng presyo ng langis ay maaaring magbunsod ng dagdag-presyo sa gasolina, diesel at kerosene, gayundin sa pamasahe, kuryente, transportasyon at iba pang serbisyo.
Lumaki rin ang pangamba sa posibleng kakulangan ng suplay dahil naaapektuhan ang pagdaan ng mga oil shipment sa Strait of Hormuz at Red Sea, na mahahalagang ruta ng pandaigdigang kalakalan ng langis.
Nagbabala rin ang mga eksperto na maaaring magdulot ito ng mas mataas na inflation at magpahirap sa mga sentral na bangko na magbaba ng interest rates sa mga susunod na buwan.
Samantala, bumagsak ang Wall Street dahil sa pagtaas ng presyo ng langis at pangamba ng mga mamumuhunan, habang tumaas naman ang halaga ng mga energy at defense stocks sa Estados Unidos.
