Pinayagan ng Senate impeachment court si Anti-Money Laundering Council (AMLC) Executive Director Ronel Buenaventura na tumestigo hinggil sa mga bank transaction ni Vice President Sara Duterte at ng kanyang asawang si Manases Carpio.
Ayon kay Senate President at impeachment court presiding officer Francis Escudero, hindi absolute ang confidentiality ng bank records at hindi maaaring gamitin ang batas upang pigilan ang AMLC sa pagsasagawa ng mandato nito.
Maaari umanong tukuyin, patunayan at ipaliwanag ni Buenaventura ang mga AMLC report na saklaw ng subpoena ng impeachment court.
Nilinaw naman ni Escudero na limitado lamang sa mga kaugnay na usapin ang testimonya at maaari itong isagawa nang in camera kung kinakailangan.
Una nang tinutulan ng kampo ni VP Sara ang pagharap ni Buenaventura bilang testigo, iginiit na dapat dumaan sa tamang proseso ang pag-verify sa mga dokumento at hindi dapat gamitin sa pamumulitika.
Samantala, sinabi ni Buenaventura na naaayon sa batas ang pagsusumite niya ng mga covered at suspicious transaction report kaugnay kina VP Sara at Carpio, alinsunod sa utos ng impeachment court.
