Nagpahayag ng mariing pagtuligsa ang Malacañang laban kay Nicolas Kaufman, legal counsel ni dating pangulong Rodrigo Duterte sa International Criminal Court (ICC), matapos nitong akusahan si Pangulong Ferdinand Marcos Jr. ng pakikialam umano sa kaso ng dating pangulo.
Sa isang pahayag noong Lunes, sinabi ni Presidential Communications Office (PCO) Undersecretary Claire Castro na “katawa-tawa” o “preposterous” ang paratang ni Kaufman na nakipagsabwatan si Marcos sa ilang hindi pinangalanang indibidwal upang impluwensiyahan ang mga testigo sa kaso sa ICC.
Ayon kay Castro, walang basehan ang alegasyon na sinisikap umano ng Pangulo na pahinain o “i-neutralize” ang pamana ni Duterte. Iginiit din niya na tila nalilito si Kaufman sa takbo ng mga pangyayari, dahil ang mga kasong crimes against humanity laban kay Duterte ay inihain sa ICC noong 2017—panahong isa pa lamang pribadong mamamayan si Marcos.
Dagdag pa ng opisyal ng Palasyo, hindi umano malinaw ang depensang inihahain ng kampo ni Duterte kaugnay ng mga kasong isinampa laban sa kanya. Si Duterte ay nahaharap sa alegasyong crimes against humanity kaugnay ng madugong kampanya kontra ilegal na droga noong siya ay alkalde ng Davao City at kalaunan bilang pangulo ng bansa.
Pinayuhan din ni Castro si Kaufman na pagtuunan ng pansin ang mga detalye at katotohanan ng kaso sa halip na umanong gumamit ng retorikang pulitikal.
Binigyang-diin din niya na hindi maaaring sabihing inosente si Duterte, at inalala ang naging pahayag ng dati nitong Cabinet secretary at miyembro ng kanyang legal team na si Silvestre Bello III, na umamin umanong may taong napatay si Duterte sa pamamagitan ng pagtapon dito mula sa isang helicopter.
