Maaaring maglabas si Pangulong Ferdinand Marcos Jr. ng executive order kaugnay sa planong pagsuspinde o pagbawas ng excise tax sa produktong petrolyo sa Abril 12 o 13, ayon sa Department of Finance noong Huwebes, Marso 26.
Sa pagdinig ng PROTECT committee ng Senado, ipinaliwanag ni Finance Undersecretary Karlo Fermin Adriano na magiging epektibo lamang ang batas 15 araw matapos itong mailathala sa Official Gazette o sa isang pahayagang may malawak na sirkulasyon.
Matatandaang nilagdaan ni Pangulong Marcos noong Marso 25 ang Republic Act No. 12316, na nagbibigay sa kanya ng emergency powers upang suspendihin o bawasan ang excise tax sa langis.
Ayon sa DOF, isinasaalang-alang ang 15-araw na palugit para sa publikasyon at bisa ng batas, kaya ang pinakamaagang panahon para makapaglabas ng executive order ang Pangulo ay sa kalagitnaan ng Abril.
Inihayag din na magpupulong ang technical board, habang ang Development Budget Coordination Committee (DBCC) ay nakatakdang magtipon sa susunod na linggo upang bumuo ng mga rekomendasyon para sa Pangulo bago ang pagpapatupad ng batas at paglalabas ng executive order.
Sa ilalim ng RA 12316, maaaring ipatupad ang suspensyon o pagbawas ng excise tax sa langis batay sa rekomendasyon ng DBCC at sa pakikipag-ugnayan sa Department of Energy, kapag ang average na presyo ng Dubai crude oil ayon sa Mean of Platts Singapore ay umabot o lumampas sa 80 dolyar kada bariles sa loob ng isang buwan.
Umaasa naman si Senador Bam Aquino na kikilos agad ang mga kaukulang ahensya upang matugunan ang isyu, lalo na’t patuloy ang pagtaas ng presyo ng diesel at gasolina.
Sa naturang pagdinig, iniulat din na magpupulong sa susunod na linggo ang Unified Package for Livelihoods, Industry, Food, and Transport (UPLIFT) upang talakayin ang mga hakbang kaugnay sa sitwasyon.
Ayon sa Department of Economy, Planning, and Development, nagsimula na ang UPLIFT committee ng mga paunang pagpupulong at nakikipag-ugnayan na sa Office of the President hinggil sa iskedyul ng Pangulo.
Binigyang-diin din ang pangangailangan ng mabilis na aksyon mula sa crisis committee, kasabay ng patuloy na pagtaas ng presyo ng produktong petrolyo.
Ang UPLIFT ay ipinatupad kasunod ng pagdeklara ng Pangulo ng state of national energy emergency, na naglalayong maglatag ng koordinadong tugon ng buong pamahalaan sa pamamagitan ng pamamahala sa suplay ng enerhiya at mga hakbang para suportahan ang mga consumer at apektadong sektor.
