Binasag na ng celebrity engineer na si Slater Young ang kanyang katahimikan kaugnay sa kontrobersiyal na Monterrazas project na itinuturong dahilan umano ng matinding pagbaha sa Cebu noong Nobyembre 2025.
Sa halos limang minutong video na inilabas noong Abril 19, una siyang nagpahayag ng pakikiramay sa mga naapektuhan ng Bagyong Tino, na aniya ay isang tunay na trahedya na dapat sagutin sa pamamagitan ng tamang impormasyon at hindi haka-haka.
Ipinaliwanag ni Young na pinili nilang manahimik noong una upang bigyang-daan ang isinasagawang mga imbestigasyon. Ayon sa kanya, mas minabuti nilang hayaang ang siyensiya at ebidensiya ang magpaliwanag kaysa makadagdag sa ingay at kalituhan.
Ibinahagi rin niya ang resulta ng isang independent study mula sa University of the Philippines, na isinagawa ng mga siyentipikong walang kaugnayan sa proyekto. Batay umano sa pag-aaral, hindi ang Monterrazas project ang sanhi o nagpalala ng pagbaha.
Ayon kay Young, ang pangunahing dahilan ay ang matinding buhos ng ulan dulot ng bagyo, na nagdala ng higit isang buwang dami ng ulan sa loob lamang ng isang araw, isang antas na magdudulot pa rin ng pagbaha kahit walang itinayong proyekto sa lugar.
Dagdag pa niya, lampas pa umano sa itinakdang pamantayan ang kanilang water management system. Halos nadoble aniya ang kapasidad nito, kung saan nakapigil ang kanilang detention ponds ng hanggang 99.74 porsiyento ng sobrang tubig-ulan at unti-unti itong pinakakawalan upang maiwasan ang biglaang pagdaloy pababa.
Giit pa niya, ipinapakita ng siyensiya na hindi lamang nila hindi naging sanhi ng pagbaha, kundi nakatulong pa ang kanilang mga sistemang inilagay upang mabawasan ito.
Nanawagan si Young na ituon ang pansin sa pagtukoy sa tunay na sanhi ng pagbaha sa Cebu upang makabuo ng epektibong solusyon, at tiniyak na handa siyang maging bahagi ng patuloy na paghahanap ng sagot sa problemang ito.
