Nagpahayag ng magkaibang pananaw sina Senate President Pro Tempore Panfilo Lacson at Senate Minority Leader Alan Peter Cayetano hinggil sa partial committee report ng Blue Ribbon Committee kaugnay ng imbestigasyon sa flood control projects.
Kinuwestiyon ni Cayetano ang pagtuon sa partial report, iginiit na hindi pa nito nailalabas ang kabuuang konteksto ng isyu at may mga katanungan pa sa proseso ng imbitasyon sa mga resource persons. Ayon sa kanya, mas mainam na hintayin ang kompletong ulat bago magbigay ng konklusyon.
Binigyang-diin naman ni Lacson, bilang chairman ng Blue Ribbon Committee, na nirerespeto niya ang desisyon ng mga miyembrong hindi pumirma sa report, bagama’t may kanya-kanya silang pananaw sa nilalaman nito.
Ayon kay Cayetano, may mga bahagi ng ulat na hindi nila sinang-ayunan kaya nag-aatubili silang lumagda, at naniniwalang hindi pa tapos ang imbestigasyon.
Sa kasalukuyan, nilagdaan ang partial report nina Lacson at ilang senador, ngunit kailangan pa ng karagdagang pirma upang maiharap ito sa plenaryo para sa debate at posibleng pag-apruba.
Sinabi rin ni Lacson na ilalatag niya sa plenaryo ang laman ng ulat sa kabila ng hindi pa ito kumpleto, upang maipaalam sa publiko ang progreso ng imbestigasyon at tugunan ang mga maling impormasyon na lumalabas.
Dagdag pa niya, maghahain siya ng privilege speech sa pagbabalik ng sesyon ng Kongreso upang talakayin ang resulta ng mga pagdinig, at maaaring isunod ang pag-turnover ng ilang bahagi ng ulat sa Department of Justice at Office of the Ombudsman matapos ito sa plenaryo.
