Inanunsyo ni House Speaker Faustino Dy III na sasagutin ng Kamara de Representantes ang gastusing medikal ng lahat ng nasugatan sa magnitude 7.8 na lindol sa Mindanao, maging sila man ay ginagamot sa pampubliko o pribadong ospital.
Sa pagbisita sa General Santos City at Sarangani kasama ang ilang mambabatas, sinabi ni Speaker Dy na maglalaan pa ng karagdagang tulong ang Kamara upang matulungan ang mga pamilyang naapektuhan ng malakas na lindol.
Ayon kay Assistant Minority Leader at Akbayan Party-list Rep. Chel Diokno, umabot na sa P9.25 milyong halaga ng ayuda ang inilaan ng 139 na mambabatas para sa mga biktima ng sakuna. Nilinaw niya na hindi napapabayaan ng mga mambabatas ang kanilang tungkulin sa kabila ng isinasagawang impeachment trial laban kay Vice President Sara Duterte.
Samantala, nagtungo rin sa Sarangani sina Acting Senate President Sherwin Gatchalian at mga senador na sina Juan Miguel Zubiri, Erwin Tulfo at JV Ejercito upang mamahagi ng tulong. Nagkaloob ang grupo ng P2.5 milyong cash assistance at mga sako ng bigas sa General Santos City at ilang bayan sa Sarangani.
Batay sa pinakahuling ulat ng National Disaster Risk Reduction and Management Council (NDRRMC), umakyat na sa 47 ang bilang ng mga nasawi habang 31 naman ang nawawala. Nasa 688 katao ang sugatan at higit 75,000 pamilya ang naapektuhan ng lindol.
Patuloy naman ang search, rescue at retrieval operations sa mga apektadong lugar habang pinalalakas ng iba’t ibang ahensya ng pamahalaan ang paghahatid ng ayuda at rehabilitasyon ng mga nasirang imprastraktura sa Mindanao.
