Nais ng Department of Finance (DOF) na mapababa ang mataas na digital transaction fees sa Pilipinas upang mapalawak ang paggamit ng digital payments at mapagaan ang gastusin ng mga mamimili at negosyo.
Sinabi ni Finance Secretary Frederick D. Go na isa sa kanyang pangunahing prayoridad ang pagpapababa ng bayarin sa digital transactions, na umaabot pa umano sa ₱50 sa ilang serbisyo. Aniya, mas mataas ito kumpara sa ibang bansa sa Asya kung saan mababa o halos wala nang singil sa mga katulad na transaksyon.
Bilang bahagi ng reporma, ibinaba ng Land Bank of the Philippines ang person-to-person transaction fee mula ₱15 hanggang ₱8 at nagsasagawa ng pilot program para sa zero convenience fees sa ilang person-to-government transactions. Inaasahan ni Go na hihikayatin nito ang iba pang financial institutions na magbaba rin ng kanilang mga singil.
Kasabay nito, nakikipag-ugnayan ang DOF sa mga bangko at fintech firms upang mapahusay ang interoperability ng payment systems at mabawasan ang gastos sa paglilipat ng pondo. Target din ng pamahalaan na pababain ang remittance fees ng mga OFW upang mas malaking bahagi ng kanilang kinikita ang mapunta sa kanilang mga pamilya.
