Umabot na sa 61 ang naiulat na bilang ng mga nasawi dahil sa magnitude 7.8 na lindol na tumama sa ilang bahagi ng Mindanao noong Hunyo 8, ayon sa Office of Civil Defense (OCD).
Sa pinakahuling tala, bumaba na sa 33 ang bilang ng mga nawawala habang umabot naman sa 1,221 ang mga nasugatan sa kalamidad.
Ayon sa OCD, karamihan sa mga pagkamatay ay dulot ng pagguho ng lupa at pagbagsak ng mga debris na sanhi ng lindol. Karamihan sa mga nasawi dahil sa mga bumagsak na istruktura ay naitala sa General Santos City, habang ang mga namatay dahil sa landslide ay mula sa Jose Abad Santos at Sarangani Island sa Davao Occidental.
Patuloy pa rin ang search and rescue operations sa mga apektadong lugar dahil mayroon pang mga nawawalang residente, partikular sa Sarangani at Jose Abad Santos. Nahirapan din ang mga rescue team na marating ang ilang komunidad dahil sa mga kalsadang natabunan ng pagguho ng lupa.
Naging hamon din sa operasyon ang problema sa komunikasyon matapos maubusan ng suplay ng gasolina ang ilang generator set na ginagamit para sa emergency telecommunications makalipas ang dalawa hanggang tatlong araw.
Kabilang sa mga lugar na higit na pinagtuunan ng pansin ng mga awtoridad sa nakalipas na tatlong araw ang Sarangani Island, Balut Island, Jose Abad Santos sa Davao Occidental, at Glan sa Sarangani Province. Ang mga lugar na ito ang ilan sa mga pinakamalubhang naapektuhan ng pagguho ng lupa at pagkasira ng mga kalsada.
Patuloy namang naghahatid ng relief goods ang pamahalaan sa mga lugar na matinding tinamaan ng lindol. Kabilang sa mga ipinapadala ang pagkain, malinis na tubig, mga materyales para sa pansamantalang tirahan, mga tent, tarpaulin, at water filtration units.
Ginagamit ng pamahalaan ang mga eroplano ng Philippine Air Force, kabilang ang C-130 at C-295 aircraft, gayundin ang mga sasakyang pandagat ng Philippine Navy at Philippine Coast Guard upang maihatid ang mga suplay. Mula rito, inililipat ang mga tulong gamit ang mga helicopter at barko patungo sa mga liblib na lugar tulad ng Glan at Balut Island. Tumulong din ang mga yunit ng Armed Forces of the Philippines sa distribusyon ng mga pangunahing pangangailangan.
Samantala, nananatiling sarado sa komersyal na operasyon ang paliparan ng General Santos City ngunit bukas ito para sa mga humanitarian mission at paghahatid ng mga relief goods.
Niyanig ng magnitude 7.8 na lindol ang karagatang bahagi ng Maasim, Sarangani alas-7:37 ng umaga noong Hunyo 8. Naitala naman ang Intensity VII sa General Santos City.
Ayon sa Philippine Institute of Volcanology and Seismology (PHIVOLCS), halos 4,000 aftershocks na ang naitala mula nang tumama ang malakas na lindol. Patuloy ang pagbabantay ng mga awtoridad habang isinasagawa ang relief, rescue, at rehabilitation efforts sa mga apektadong komunidad.
