Nakahandang gamitin ng pamahalaan ang mahigit P7.8 bilyong pondo mula sa National Disaster Risk Reduction and Management Fund para sa mga hakbang sa pagtugon at relief operations kaugnay ng epekto ng El Niño sa bansa, ayon sa Office of Civil Defense (OCD).
Sa forum sa Quezon City nitong Sabado, sinabi ni OCD spokesperson at Disaster Preparedness Service Director Vic Tomas na may nakalaang P7.864 bilyon para sa mga kinakailangang hakbang laban sa epekto ng El Niño.
Sa datos ng National Disaster Risk Reduction and Management Council, umabot na sa 106 na lugar sa limang rehiyon ang nagdeklara ng state of calamity, kabilang ang 66 na lugar sa Cagayan Valley.
Mayroon ding P6.685 bilyon sa ilalim ng Disaster Rehabilitation and Reconstruction Assistance program na maaaring gamitin lalo na sa mga lugar na nagdeklara na ng state of calamity.
Samantala, iniulat ng Department of Agriculture na umabot na sa P6.87 bilyon ang pinsala at pagkalugi sa sektor ng agrikultura dulot ng El Niño, na nakaapekto sa 223,214 na magsasaka hanggang Setyembre 26, 2026.
