Arestado ang dalawang sales associate matapos mahuli sa umano’y pagnanakaw ng mga kable sa loob ng isang mall sa Santiago City.
Kinilala ang mga suspek sa alyas na sina “Gel,” 23-anyos, residente ng Gamu, Isabela; at “Ben,” 27-anyos, may asawa, residente ng Echague, Isabela.
Batay sa ulat, napansin ng isang merchandiser ang kahina-hinalang paglalagay ng isang kahon ng Wiremax wires at cables na may sukat na 8.00 mm at habang tinatayang 100 metro sa isang motorsiklong nakaparada sa basement ng establisimyento.
Agad niya itong iniulat sa kanyang supervisor, na siya namang nagpaabot ng impormasyon sa pamunuan ng mall security.
Sa beripikasyon, napag-alamang pagmamay-ari ni alyas “Gel” ang Honda Click 125, habang ang isa pang kahon ng kable ay narekober mula sa Rusi 150 na Motorsiklo at pagmamay-ari naman ni alyas “Ben.”
Sa follow-up na imbestigasyon at roving, nakumpirma na ang mga suspek ay umano’y kumuha ng mga nasabing kagamitan nang walang pahintulot at sinamantala ang kanilang posisyon bilang empleyado.
Narekober ang mga ninakaw na kable na nagkakahalaga ng humigit-kumulang ₱13,800 at naibalik sa pamunuan ng mall
Kasalukuyang nasa kostudiya ng Pulisya ang mga suspek at Nahaharap sa kasong Qualified Theft.
